Muni-muni 2

Ang personality ko ayon sa mga iba-ibang pagsusulit sa internet ay INFJ (Introvert, Intuitive, Feeling, Judging) o INFP (kapareho sa 3 letra + Perceiving). Counselor o Healer. Counselor/Healer. Counselor-Healer. Teka, yung Feeling hindi ibig sabihin feelingera, sa pagkakaintindi ko ibig sabihin nito maramdamin, ayaw makasakit ng damdamin at nagpapadala sa bugso ng damdamin.

Maraming kung ano-anong paliwanag sila dok ukol sa mga personality. Subukan niyong kumuha ng simpleng bersyon ng Jung/Briggs-Meyer personality test dito. Basahin ang mga resulta at tignan kung tama nga sila dok sa'yo. Para sa akin, medyo tama ang mga basa nila dok. At sa dinami-rami ng mga deskripsyon sa personalidad ko, ang pinakatumatak sa akin ay ang uri daw ng personalidad ko ay ang unang tinatanggal sa trabaho kung merong downsizing na kinakailangan. eeeep!

Mga agam-agam.

Siguro, na-bore na sila rito sa paksan ko, kaya maaari ko ng i-post ang mga larawang ito na matagal ko ng kinunan. Bilang Counselor/Healer, ang isa pang bagay na tumatak sa akin ay malakas ang Intuition ko. Tuldok. Tuldok. Tuldok.

++++++++++

Baka isipin nina suking pa-developan eh stalker na ko ni Pao. Madalas kasi siyang laman ng larawan.

Kaya iyan, ibang tao naman ang mga nadevelop.... sa film.

Fire and Ice ^^. Dahil sa light leak (pula) at internal reflection (puti). Isa ito sa mga masasabing sira ng camera ko. Ngayon nilagyan ko ng mga itim na electrical tape ang paligid para mapigilan ang pagpasok ng ilaw sa gilid-gilid na nagdudulot light leak. Hahanap pa ko ng flocking para naman ilatag sa interyor ng camera para maiwasan yung parang barrel reflection, na ang pagtalbog naman ng sobrang ilaw sa loob ng katawan ng makinis at makintab na camera. Pero parang angkop sa paksa ang kinalabasan.

Malilim pero mataas ang araw sa lugar na 'yan. Pero parang palubog na ang araw dahil sinubukan kong i-push ang ISO 100 na maging 200. Hindi ko pa kasi alam na ma-underexpose kapag mas mataas ang ISO na gamitin at 100 lang ang sabi sa kahon ng film. Sa digital kasi, kung gusto mong lumiwanag ang kukunan tataasan ng ISO setting.

Sinubukan kong kunan sila ng hindi nila nalalaman.

Ang kasapakat. Hindi ko alam kung pansin niyo, marahil kasi hindi niyo siya kilala, pero para sa akin kitang-kita ko ang galak niya sa araw na kinunan ito.

Ginagamit ko na ang Picasa kasi malapit ng mapuno ang libreng flickr account ko. Gagawa sana ako ng collage sa Picasa, libreng photo storage ng Google. Pero hindi ko alam kung anong napindot ko at nagmukhang double exposure ang dalawang larawang ito.

Kaya gumawa na lang uli ako ng isa pang collage.Mga busilak ang pusong nag-alay ng panahon sa pagtayo sa paghabol ko sa sining. Salamat.

PEACE

Lahat ng larawan ay kuha gamit ang Yashica FX-D, ISO 100 film (used 200 setting), f 16, 1/125